Pwèl nan zo Pwezi

Publié par Anderson Dovilas sur 6 Septembre 2012, 01:32am

Catégories : #Pwezi

Ak dènye rekèy sa a Anderson Dovilas pote pou nou an : « Pwèl nan zo », lalin pwezi sispann leve nan yon sèl katye, paske lektè nou yo bouke ak bouyon rechofe, refren ti bebe rechiya.

Pawòl pwèl nan zo sa a, ap vanse chimen l’, li fè wout pou tout moun jwenn yon ti moso silab. Dovilas se yon powèt djougan ki pa pote plim pou bèl lank. Li se yon powèt maton ki mitonnen fon kè nou ak mo byen banda pou bande venn lanmou nou. Li di lonè, nou di l’ respè. Nou ka menm di, Dovilas se powèt ki tann lè tout miray jeriko yon pèp fin kraze, epi li rekonstwi yo ak flit bèl mo. Li se rezilta rechèch estetik yon don lasirèn ba li.

Yves Poindujour

Décembre, 2008.

...

Gen yon solèy

Latè pral konnen

Lè w souri

Gen yon zetwal

Ki chape nan jansiv

Granm maten

Lè souri w ap eple

Tout sans bèl mo

Anba vant lawouze